Siyosat inson hayotidan ustun....

25-dekabr kuni Bakudan Grozniga parvoz qilayotgan Embraer 190 yo‘lovchi samolyoti Qozog‘istonning Aktau shahri yaqinida halokatga uchradi. Ushbu fojiali voqeada 38 inson hayotdan ko‘z yumdi, 29 kishi esa omon qoldi. Halokat sabablari haqida Ozarbayjon rasmiylari Rossiyaning “Pantsir-S” havo mudofaa tizimi tomonidan hujum amalga oshirilganini tasdiqladi.

Bu dahshatli hodisa yana bir bor dunyoda siyosat va kuch inson hayotidan ustun qo‘yilayotganini ko‘rsatdi. Inson hayoti, uning qadri va orzulari bunday shafqatsizliklar qarshisida har safar yo‘qolib ketmoqda. Insoniyat bunday fojialarni kechirib, yana davom etadi, ammo bu davomni haqiqiy tinchlik va adolat bilan to‘ldirmasak, biz o‘z kelajagimizni boy berayotgan bo‘lamiz.

Bu fojiada hayotdan ko‘z yumgan har bir insonning ortida bir dunyo orzular, rejalari va yaqinlari bor edi. Biz ushbu insonlarning oilalariga, yaqinlariga chuqur hamdardlik bildiramiz va ularga sabr tilaymiz. Biz Ozarbayjon xalqining bu og‘ir kunlarda qanday qayg‘uga botganini his qilamiz va ular bilan birgamiz.

Bunday fojialardan keyin faqat uzr so‘rash yoki sukut saqlash yetarli emas. Bu bizdan chuqurroq o‘zgarishlarni talab qiladi. Inson hayoti har narsadan ustun bo‘lishi kerak!

Halok bo‘lganlarga Allohdan rahmat, yaradorlarga tezroq sog‘ayishni tilaymiz. Ozarbayjonlik qardoshlarimizga chuqur qayg‘ularini yengib o‘tishda kuch va iroda tilaymiz. Biz insoniylikni unutmaganlar bilan birgamiz!